De Oorlogsjoaren (versie Westerkwartiers)

De Oorlogsjoaren (versie Westerkwartiers)

Ik ben ien 1942 geboren en as ik der loater met pabbe en mamme over proatte, dan was dat n hiele spannende tied. Zij konden der zo mooi over vertellen, het was net of je t metbeleefden. Zo vertelden ze ok t volgende verhoal.

Ien e glob tussen t huus van e buren en ons huus komt n motor met ziespan aan, t was net ien e tied dat er weer minsen links en rechts oppakt werden. Pabbe zee tegen de jongens ien e bakkerij: vot jongens! Ze vlogen achteruut, op sokken of wat ze mor aan hadden. Zo deur de landerijen, over de sloden en deur de hegen hin.

Dicht bij de Schipsloot kommen ze ien n roggeveldje terecht, vanof huus kikt pabbe over t veld hin en dan zigt der hier n kop en dan doar n kop boven e rogge uutkommen.
Noa n pooske i-der gien gevoar meer en kommen ze bij mekoar. Pabbe zeid tegen Piet Postmoa, wat hestoe doar ien e haand. Piet het e veger woar der met toe de bakkerij uutvlogen was nog ien e hand.

Ien die meidoagen toen ok de minsen op e Hoar doodschoten binnen, toen was t ok angsteg. Mien oma was kosteres van e Nederlands Hervormde kerk en mien pabbe het n poar week lang ien e toren sloapen. Hij docht dat er doar veileg was, dat was vanzulf ok wel zo.
Op n nacht schrikt er hum dood, vlugt doar n katoel over hem hin. Hij docht dat er n kogel iensloeg, toen het er t wel even benauwd had.

t Was ok holden en keren bij de klanten, want der wadden goenent bij die hadden wel sympathie veur de NSB en je mosten hiel veurzichteg weden wat je zeden. Eén klant, dat was n echte NSB’er en doar ging pabbe wel tegen ien. Want hij har wel n karakter, hij liet niet over hum hinlopen. Ien e tied van de slag om Stalingrad, zee die vrouw’ de Duutsers hemmen Stalingrad al bijna iennommen’. Nou zee pabbe ‘die kriegen ze nooit’!
Dat is gelukkig ok niet gebeurd, mor hij was de klant wel kwiet.

Henk Dikkers (geboren 1942), geïnterviewd door Martje Grondsma en Alie de Vries

Interview ien t kader van t ‘Streektoal project Moarum’, 2004
Ien opdracht van de RUG, Professor Siemon Reker